टेरामक्स काण्डमा मुछिएका सचिवको चलखेल, मन्त्री जोशीलाई असहयोग

काठमाडौं । टेरामक्स खरिद काण्डमा मुछिएका संघीय मामिला तथा सामान्य प्रशासन मन्त्रालयका सचिव विनोदप्रकाश सिंहले मन्त्री भानुभक्त जोशीले सचिवालयका कर्मचारीको नाम दिंदा पनि ब्यवस्थापन गर्न ढिलाइ गरी असहयोग गरिरहेका छन् । मन्त्री जोशीको सचिवालयमा निजी सचिवको नाम दिंदा पनि उनले राख्न आनाकानी गरिरहेको स्रोत बताउँछ ।

मन्त्रालयको कर्मचारी प्रशासन शाखाका उपसचिवद्वयको सरुवा गर्न निर्देशन दिएको ४ दिन बितिसक्दा पनि उनले गरेका छैनन् ।

कर्मचारी प्रशासन शाखाका उपसचिव नफेर्ने र ब्याकडेट राख्दै आर्थिक लाभ लिएर सरुवा गर्ने काम सचिव सिंहले अहिले पनि गरिरहेका छन् । यसअघिकै मन्त्री अनितादेवी साह भएको मिति राखी सरुवा गर्नकै लागि उनले कर्मचारी शाखाका उपसचिव हटाउन बिलम्ब गरेको आरोप छ ।

साह मन्त्री हुँदा उनीसँग मिलेर सचिव सिंहले तराईका नगरपालिकामा निमित्तप्रमुख प्रशासकीय अधिकृत तोक्दा मात्रै २० लाख रुपैयाँ घुस लिएको आरोप लागेको थियो ।  मन्त्री साहसँग मिलेर सचिव सिंहले स्थानीय तहका प्रमुख प्रशासकीय अधिकृतको सरुवामा दररेट तोकेर गरेका थिए ।

टेरामक्स काण्ड लागेका सचिव सिंहलाई तुरुन्त हटाउन मन्त्री जोशीमाथि दबाब परेको छ । सोझा मन्त्री जोशीलाई भेगीय नाता लगाएर टिक्ने दाउमा सचिव सिंह लागेका छन् ।

सामान्य प्रशासन मन्त्रालयको सचिवमा राष्ट्रिय तथ्यांक कार्यालयका प्रमुख तोयम राया र बागमती प्रदेशका प्रमुख सचिव घनश्याम उपाध्यायमध्ये एकलाई ल्याउन मन्त्री जोशीलाई कर्मचारीहरुले सुझाव दिएका छन् ।