सर्लाहीमा एसपीकै संरक्षणमा संगठित तस्करी, घुमुवा प्रहरीकै गोप्य सेटिङ नेटवर्क !

सर्लाही । मधेस प्रदेशको सर्लाहीमा बर्षौंदेखि चल्दै आएको तस्करी अहिले प्रहरीकै संरक्षणमा खुलेआम सञ्चालन भएको तथ्य बाहिरिएको छ ।

जिल्ला प्रहरी कार्यालय सर्लाहीका प्रमुख एसपी योगेन्द्र खड्काको नेतृत्वमा तस्करीलाई व्यवस्थित रूपमा सञ्चालन गर्न स्थानीय प्रहरी, पासिङ एजेन्ट र तस्करबीच छुट्टै नेटवर्क बनेको प्रहरी स्रोतको दाबी छ ।

जिल्लाका प्रमुख सीमा नाका सखुवबा, फेनहरा, हिरापुर ब्यारेज, बहादुरपुर, मधुवनी गोठ, अर्नाहा र बलरातर्फ भारतबाट दैनिक रूपमा कपडा, सुपारी, सुर्ती, खाद्यान्न, किराना, बीउ, मोबाईल, चिनी, मलदेखि कुखुरासम्म भित्रिन्छ । ती मालवस्तु बरहथवा र वरपरका गोदाममा लगेर जम्मा गरिन्छ र त्यहाँबाट पिकअप तथा ट्रकमार्फत् राजधानी, हेटौंडा र बागमतीसम्म पुर्याइन्छ ।

तस्करीका रुट सञ्चालन गर्न जिल्ला प्रहरी कार्यालय सर्लाहीका घुमुवा प्रहरी सहायक हवल्दार भाग्यनारायण साहले नाकामा खटिएका असईदेखि स्थानीय एजेन्टसम्मको सम्पूर्ण सेटिङ मिलाइरहेका स्रोतहरूले बताएका छन् ।

नाका पार गर्ने गाडी, भन्सारछलीका सामान, रकम संकलन र बितरण सबै साहकै समन्वयमा चल्ने गरेको बताइन्छ । शाहलाई एसपी स्तरबाट यस्तो गतिविधिमा पूर्ण संरक्षण मिलेको प्रहरीभित्रै चर्चा छ ।

सर्लाहीमा कपडा, किराना र खाद्यान्न तस्करीमा हिरालाल साह, इन्दु सहनी, रामेश्वर साह, करन्जित बैठाव, अमामुल, सुरेश यादव, प्रमोद यादव, बृज यादव, मुकेश शाह, बिनोद शाह, सुरेन्द्र यादव, रौसन यादव, कन्हाई पण्डित र रसिया यादव सक्रिय छन् । नवीन चौधरी ‘मुना’ कपडा, बीउ, मकै र काठपलाइमा संलग्न छन् । राजेश ठाकुर भारतबाट मकै, पटाका, बीउ ल्याएर नेपालतर्फबाट स्याउ उता पठाउने गर्छन् ।

यसबाहेक कवाड कारोबारमा विजय यादव, कपडामा सखुवबा नाकाका विजय पुकार, त्यही नाकाबाट कवाड, धान र गहुँ तस्करी गर्ने कृष्ण यादव, मोबाइल र बीउमा धर्मेन्द्र महतो, चिनी खादमा गैरको दिनेश महतो, धानमा अजय शाह, कुखुरा तस्करीमा भाड्सर–खुटौना नाकाका दिपक कलवार चौधरी सक्रिय देखिन्छन् ।

नवलपुर क्षेत्रमा किराना तस्करीमा सुबोध चौधरी संलग्न छन् । फेनहरा नाकामा खटिएका प्रहरी असईलाई नियमित रकम बुझाउने व्यक्तिको रूपमा बरहथवाका राजेश महतोको नामसमेत खुलेको छ ।

तस्करीमा संलग्न व्यक्तिहरू, नाका, रुट, गाडी, प्रहरी संलग्नता सबै सार्वजनिक जानकारीजस्तै खुला भइसके पनि जिल्ला प्रशासन, प्रहरी प्रधान कार्यालय र गृह मन्त्रालयले कुनै कदम चाल्न सकेको छैन । प्रहरीकै प्रत्यक्ष निगरानीमा तस्करी चलिरहेकाले स्थानीयबासीले सर्लाहीलाई ‘खुलेको नाका’जस्तै अवस्था भएको टिप्पणी गरेका छन् ।